சர்வதேச டெஸ்ட் கிரிக்கெட்டில் அதிக ஓட்டங்கள் எடுத்தவர்களின் பட்டியலில் இங்கிலாந்தின் ஜோ ரூட் (Joe root) 02 வது இடத்திற்கு முன்னேறியுள்ளார். இந்தியா - இங்கிலாந்து அணிகளுக்கிடையிலான 04 வது டெஸ்ட் போட்டியில் ஜோ ரூட் 38 வது சதத்தைப் பதிவு செய்தார். இதனையடுத்து டெஸ்ட் கிரிக்கெட்டில் சில மைல்கல் சாதனைகளை ஜோ ரூட் நிலைநாட்டினார்.
டெஸ்ட் கிரிக்கெட்டில் தனது மொத்த எண்ணிக்கையை 13,409 ஓட்டங்களாக உயர்த்தியதன் மூலமாக சச்சின் டெண்டுல்காரின் 15,921 ஓட்டங்களுக்கு அடுத்ததாக அதிக ஓட்டங்கள் குவித்தவர்கள் வரிசையில் 02 ஆம் இடத்தை அடைந்துள்ளார்.
இந்தியாவின் ராகுல் ட்ராவிட் (13,288), தென் ஆபிரிக்காவின் யக்ஸ் கல்லிஸ் (13,289), அவுஸ்திரேலியாவின் ரிக்கி பொன்டிங் (13,378) ஆகியோரை பின்தள்ளியே ஜோ ரூட் 02 ஆம் இடத்தை அடைந்தார்.
அத்துடன் 38 வது சதத்தைத் குவித்ததன் மூலமாக சச்சின் டெண்டுல்கார் (51 சதங்கள்), யக்ஸ் கல்லிஸ் (45), ரிக்கி பொன்டிங் (41) ஆகியோருக்கு அடுத்ததாக குமார் சங்கக்காரவுடன் (38) 05 ஆம் இடத்தை ஜோ ரூட் பகிர்ந்து கொண்டுள்ளார்.
முதலாவது வீரர் சாதனை
ஓல்ட் ட்ரஃபர்ட் விளையாட்டரங்கில் ஜோ ரூட் 1128 ஓட்டங்களைப் பெற்றுக் கொண்டார். இதன் மூலமாக இந்த விளையாட்டரங்கில் 1000 ஓட்டங்களைக் கடந்த முதலாவது வீரர் என்ற சாதனையை இவர் நிலைநாட்டினர்.
லோர்ட்ஸ் விளையாட்டரங்கிலும் இவர் 1000 க்கும் மேற்பட்ட ஓட்டங்களை குவித்துள்ளார். இங்கு இவர் 2166 ஓட்டங்களை மொத்தமாக குவித்துள்ளார் என்பது கறிப்பிடமத்தக்கது.
0 Comments