செப்டம்பர் மாதத்துக்கான சிறந்த வீரர் மற்றும் வீராங்கனைக்கான விருதினை அபிஷேக் சர்மா மற்றும் ஸ்மிருதி மந்தனா வென்றுள்ளனர்.
ஒவ்வொரு மாதமும் சிறப்பாக செயற்படும் வீரர், வீராங்கனைகளை கௌரவிக்கும் விதமாக ICC சார்பில் விருது வழங்கப்பட்டு வருகின்றது.
அவ்வகையில், செப்டம்பர் மாதத்துக்கான சிறந்த வீரர், வீராங்கனை விருதினை இந்திய அணியின் தொடக்க ஆட்டக்காரர்களான அபிஷேக் சர்மா மற்றும் ஸ்மிருதி மந்தனா ஆயோர் வென்றுள்ளனர்.
ஆசியக்கிண்ண கிரிக்கெட் தொடரில் அபாரமாக விளையாடிய அபிஷேக் சர்மா, 07 போட்டிகளில் 314 ஓட்டங்களை எடுத்தார்.
இத்தொடரில் அவரது சராசரி 44.85 ஆகவும், ஸ்டிரைக் ரேட் 200 ஆகவும் இருந்தது. தொடர் முழுவதும் சிறப்பாக செயற்பட்ட அபிஷேக் சர்மாவுக்கு தொடர் நாயகன் விருது வழங்கப்பட்டது. ICC T20 துடுப்பாட்ட தரவரிசையில் அதிக ரேட்டிங் புள்ளிகளையும் எடுத்துள்ளார்.
ICC யின் சிறந்த வீரர்களுக்கான போட்டியில் குல்தீப் யாதவ் மற்றும் சிம்பாப்வே அணியின் பிரையன் பென்னட் இடம் பெற்ற நிலையில், விருதினை அபிஷேக் சர்மா என்பவர் தட்டிச் சென்றார்.
அவுஸ்திரேலியாவுக்கு எதிராக கடந்த மாதம் நடைபெற்ற ஒருநாள் தொடரில் இந்திய அணியின் துணைத் தலைவியான ஸ்மிருதி மந்தனா, அபாரமாக விளையாடி ஓட்டங்களையும் குவித்தார்.
03 போட்டிகளில் அவர் 58 ஓட்டங்கள், 117 ஓட்டங்கள், 125 ஓட்டங்கள் முறையே எடுத்தார். கடந்த மாதத்தில் நான்கு ஒருநாள் போட்டிகளில் விளையாடிய அவர், 308 ஓட்டங்களை குவித்தார்.
ICC யின் சிறந்த வீராங்கனைகளுக்கான போட்டியில் தென்னாபிரிக்க அணியின் தஸ்மின் பிரிட்ஸ் மற்றும் பாகிஸ்தானின் சித்ரா அமின் இடம்பெற்ற நிலையில், ஸ்மிருதி மந்தனா சிறந்த வீராங்கனைக்கான விருதினையும் வென்றுள்ளார்.
0 Comments