கொழும்பு மருதானையிலுள்ள ஒரு பிரசித்தி பெற்ற ஆண்கள் பாடசாலையில் இடம்பெற்ற சம்பவம், தனிநபர்களை மட்டுமே குற்றம் சாட்டும் ஒரு செய்தியாக பார்க்க முடியாத நிலைக்கு சமூகத்தை கொண்டு வந்துள்ளது. Head Prefect என்ற உயரிய மாணவ தலைமைப் பொறுப்பை வகித்த ஒரு மாணவனும், அதே பாடசாலையில் பணியாற்றிய நான்கு பெண் ஆசிரியைளும் தொடர்புடையதாக வெளியான வீடியோ, கல்வி அமைப்பின் அடிப்படை மதிப்புகளையே கேள்விக்குறியாக மாற்றியுள்ளது. இந்தச் சம்பவம், ஒருவரின் வீழ்ச்சியாக மட்டும் அல்ல, ஒரு அமைப்பின் மௌனத் தோல்வியாகவும் பார்க்கப்பட வேண்டியதாக உள்ளது.
ஒரு மாணவன் “Perfect Gentleman” என போற்றப்பட்டு, படிப்பிலும் விளையாட்டிலும் சிறந்து, ஆசிரியர்களின் நம்பிக்கையையும் பெற்ற நிலையில், தலைமை மாணவனாக உயர்த்தப்பட்டமை, வெளிப்புற தோற்றங்கள் எவ்வளவு ஏமாற்றக் கூடியவை என்பதைக் காட்டுகிறது. ஒழுக்கம், கட்டுப்பாடு, பொறுப்பு என்பவை சீருடை அணிவதால் அல்லது பதவி பெறுவதால் தானாக உருவாகி விடுவதில்லை. அவை தொடர்ந்து கண்காணிக்கப்பட்டு, வழிநடத்தப்பட வேண்டிய மதிப்புகள். அந்த இடத்தில் ஏற்பட்ட தவறுகள், தனிநபரின் எல்லையை தாண்டி, அமைப்பின் கவனக்குறைவையும் சுட்டிக் காட்டுகின்றன.
அதே நேரத்தில், மாணவர்களுக்கு ஒழுக்கம் கற்பிக்க வேண்டிய ஆசிரியர்கள் தொடர்பாக எழும் கேள்விகள், சமூகத்தை மேலும் அதிர்ச்சியடையச் செய்கின்றன. ஆசிரியர் என்ற பதவி அறிவை மட்டும் அல்ல, நெறியையும் பிரதிநிதித்துவப்படுத்தும் ஒன்று. அந்த எல்லை மீறப்படும் போது, அது மாணவர்களின் மனதில் மட்டுமல்ல, முழு சமூகத்தின் நம்பிக்கையிலும் விரிசலை ஏற்படுத்துகிறது. இது தவறு அல்ல; கல்வியின் அடிப்படை நோக்கத்தையே சிதைக்கும் ஒரு கடுமையான வீழ்ச்சி.
இந்தச் சம்பவத்தில் வீடியோ கசிவு, சமூக ஊடகங்கள், நண்பர்கள் என்ற விவாதங்கள் எழுந்தாலும், அதற்கு முன்பே நடந்த எல்லை மீறல்களே மையக் கேள்வியாக இருக்க வேண்டும். சமூக ஊடகம் உண்மையை வெளிச்சத்திற்கு கொண்டு வந்திருக்கலாம்; ஆனால் அந்த உண்மை உருவான சூழல் ஏன் நீண்ட காலம் கண் மூடப்பட்டு இருந்தது என்பதே முக்கியமான கேள்வி. கண்காணிப்பு, வழிகாட்டல், பொறுப்புணர்வு ஆகியவை எங்கு தளர்ந்தன என்பதை ஆராய வேண்டிய கட்டாயம் இதன் மூலம் உருவாகியுள்ளது.
இதனால், இந்தச் சம்பவம் ஒரு செய்தியாக மட்டுமே முடிவடையக் கூடாது. கல்வி அமைச்சு, பாடசாலை நிர்வாகங்கள், ஆசிரியர் பயிற்சி அமைப்புகள் ஆகிய அனைத்தும் தங்களைத் தாங்களே கேள்விக்குள்ளாக்கிக் கொள்ள வேண்டிய தருணம் இது. அறிக்கைகள், விசாரணைகள் என்ற வார்த்தைகளைக் கடந்த உண்மையான மாற்றங்கள் இல்லையெனில், இன்றைய அதிர்ச்சி நாளைய மறதியாக மாறும் அபாயம் உள்ளது.
இறுதியாக, குழந்தைகளை நம்பிக்கையுடன் பள்ளிகளுக்கு அனுப்பும் பெற்றோர்களின் மனதில் எழும் கேள்வி தான் மிகப் பெரிய எச்சரிக்கை. கல்வி என்பது சான்றிதழ்கள் வழங்கும் தொழிற்சாலையல்ல; அது மனிதர்களை உருவாக்கும் புனிதப் பொறுப்பு. அந்தப் பொறுப்பு கேள்விக்குறியாக மாறும் போது, அதை தனிநபர் தவறாகச் சுருக்காமல், ஒரு சமூகப் பிரச்சினையாக எதிர்கொள்வதே உண்மையான தீர்வாக இருக்கும்.
-நஸார் இஜாஸ் -
0 Comments