இந்தியாவின் கர்நாடக மாநிலத்தில் அரச மற்றும் தனியார் நிறுவனங்களில் பணியாற்றும் பெண் ஊழியர்களுக்கு சம்பளத்துடன் கூடிய மாதவிடாய் விடுமுறையை வழங்க அமைச்சரவை முடிவு செய்துள்ளது.
அமைச்சரவை கூட்டத்தில் கடந்த ஒரு மாதத்திற்கு முன்னர், மாதவிடாய் விடுமுறை கொள்கை 2025 ஆம் ஆண்டில் ஒப்புதல் வழங்கப்பட்டது.
இதன்படி, பெண் ஊழியர்களுக்கு மாதம் ஒரு நாள் வீதம் ஆண்டுக்கு 12 நாட்கள் சம்பளத்துடன் கூடிய மாதவிடாய் விடுமுறையை அரச, தனியார் நிறுவனங்கள் கட்டாயம் வழங்க வேண்டுமென்று தீர்மானிக்கப்பட்டது.
இதன்படி, கர்நாடக அரசு, அரச, தனியார் நிறுவனங்களில் பணியாற்றுகின்ற பெண் ஊழியர்களுக்கு மாதம் ஒரு நாள் மாதவிடாய் விடுமுறை வழங்க வேண்டுமென்று உத்தரவிட்டுள்ளது.
குறித்த உத்தரவு அரச, தனியார் நிறுவனங்கள், கடைகள், வணிக நிறுவனங்களில் நிரந்தர, ஒப்பந்த, வெளிகுத்தகை உட்பட எந்த ரீதியில் பணியாற்றினாலும் குறித்த பெண் ஊழியர்களுக்கு இது பொருந்தும் என்றும் அதில் தெரிவிக்கப்பட்டுள்ளது.
குறித்த உத்தரவு நடைமுறைக்கு முன்னதாக மாதவிடாய் விடுமுறை வழங்குவது குறித்து பேராசிரியை சப்னா கிறிஸ்ட் தலைமையில் 18 பேர் கொண்ட குழுவொன்று அமைக்கப்பட்டது. இக்குழு மாதவிடாய் விடுமுறை வருடத்துக்கு 06 நாட்கள் வழங்கலாம் என்று அரசுக்கு பரிந்துரை செய்தது.
பின்னர், அந்த குழு அதனை 12 நாட்களாக அதிகரித்து பரிந்துரைத்தது. ஒருவேளை குறிப்பிட்ட மாதத்தில் குறித்த விடுமுறையை எடுக்காவிட்டால், அதனையும் சேர்த்து வைத்து அடுத்த மாதம் குறித்த விடுமுறையை எடுக்க முடியாது என்றும் தெரிவிக்கப்பட்டுள்ளது.
அத்தோடு, மாதவிடாய் விடுமுறைக்கு மருத்துவ சான்றிதழ் எதுவும் தாக்கல் செய்ய தேவையில்லை என்பதுடன், இந்த மாதவிடாய் விடுமுறை 18 வயது முதல் 52 வயது வரையுள்ள பெண் ஊழியர்களுக்கு மட்டுமே பொருந்துமென்றும் குறித்த உத்தரவில் தெரிவிக்கப்பட்டுள்ளது.
0 Comments