பாடசாலை நேரத்தை நீடிக்காதிருக்க கல்வி அமைச்சு முடிவு.

பாடசாலைக் கட்டமைப்பு மற்றும் போக்குவரத்து கட்டமைப்பு வழமைக்குத் திரும்பும் வரை 2026 ஆம் ஆண்டில் பாடசாலை நேரத்தை நீடிக்காதிருப்பதற்கு கல்வியமைச்சு தீர்மானித்துள்ளது.

நாட்டினுள் ஏற்பட்டுள்ள அனர்த்த நிலைமை மற்றும் சில மாகாணங்களில் பாடசாலைக் கட்டமைப்பு மற்றும் போக்குவரத்து கட்டமைப்புக்கு ஏற்பட்டுள்ள சேதங்களைக் கருத்திற் கொண்டு இத்தீர்மானம் மேற்கொள்ளப்பட்டுள்ளது.

இதற்கமைய கல்வியமைச்சு விடுத்துள்ள அறிக்கையில் பின்வருமாறு தெரிவிக்கப்பட்டுள்ளது:

2026 ஆம் ஆண்டில் 05 - 13 வரையான தரங்களுக்கான பாடசாலை நேரம் 7.30 AM முதல் 1.30 PM வரை மாற்றமின்றி தொடரும்.

அரச, அரச அங்கீகாரம் பெற்ற தனியார் பாடசாலைகள் மற்றும் பிரிவெனாக்கள் 2026 இல் முதலாம் தவணைக்காக 2026 ஜனவரி 05 ஆம் திகதி ஆரம்பமாகவுள்ளன.

தரம் 06 தொடக்கம் 13 வரையான ஒரு நாளுக்கான பாடவேளைகளின் எண்ணிக்கை 07 ஆகும்.

ஒரு பாடவேளைக்காக 45 நிமிடங்கள் ஒதுக்கப்படும்.

2026 ஆம் ஆண்டில் கல்வி மறுசீரமைப்புச் செயற்பாடு தரம் 01 மற்றும் தரம் 06 இற்கு நடைமுறைப்படுத்தப்படும்.

கல்வி மறுசீரமைப்புச் செயற்பாட்டின் கீழ் தரம் 06 இற்கான கல்வி நடவடிக்கைகள் உத்தியோகபூர்வமாக 2026 ஜனவரி 21 ஆம் திகதி ஆரம்பமாகவுள்ளன.

தரம் 01 இற்கான மாணவர்களை அறிமுகப்படுத்தும் செயற்பாடு 2026 ஜனவரி 05 ஆம் திகதி ஆரம்பமாகவுள்ளதுடன், உத்தியோகபூர்வமாக கல்வி நடவடிக்கைகள் 2026 ஜனவரி 29 ஆம் திகதி ஆரம்பமாகும்.

தரம் 01 இற்குரிய செயற்பாடுகள் புத்தகங்கள் மற்றும் தரம் 06 இற்குரிய கற்றல் தொகுதிகள் (Learning Modules), அந்தத் தரங்களின் கல்வி நடவடிக்கைகள் ஆரம்பமாவதற்கு முன்பு மாணவர்களுக்கு வழங்கி முடிக்க நடவடிக்கை எடுக்கப்பட்டுள்ளது.