லிட்ரோ எரிவாயுவின் விலை திருத்தம் தொடர்பான அறிவிப்பு

இம்மாதத்தில் லிட்ரோ சமையல் எரிவாயு விலையில் திருத்தம் மேற்கொள்ளப்பட மாட்டாது என்று தெரிவிக்கப்படுகிறது. 

உலகச் சந்தையில் நிலவும் நிலவரங்களின் பிரகாரம் எரிவாயு விலையை அதிகரிக்க வேண்டிய தேவை இருந்த போதிலும், நாட்டில் நிலவும் சூழ்நிலைகளைக் கருத்திற் கொண்டு இந்நேரத்தில் விலைத் திருத்தத்தை மேற்கொள்ளப் போவதில்லை என்று அந்நிறுவனத்தின் பேச்சாளர் ஒருவர் தெரிவித்துள்ளார். 

இதற்கமைய, 12.5 Kg நிறையுடைய லிட்ரோ சமையல் எரிவாயு 3,690 ரூபாய்க்கு விற்பனை செய்யப்படவுள்ளது. 

05 Kg நிறையுடைய எரிவாயு 1,482 ரூபாய்க்கும், 2.3 கிலோகிராம் நிறையுடைய எரிவாயு 694 ரூபாய்க்கும் விற்பனை செய்யப்படும் என்று அறிவிக்கப்பட்டுள்ளது.

இதேவேளை, நேற்று (01) முதல் அமுலாகும் வகையில் லாஃப்ஸ் சமையல் எரிவாயுவின் விலையும் அதிகரிக்கப்பட்டுள்ளது. 

அதன்படி 12.5 Kg நிறையுடைய லாஃப்ஸ் சமையல் எரிவாயுவின் விலையானது 150 ரூபாயினால் அதிகரிக்கப்பட்டுள்ளது. 

இதன்படி, 12.5 Kg நிறையுடைய லாஃப்ஸ் சமையல் எரிவாயுவின் புதிய விலையானது 4250 ரூபாவாகும். 

அதேநேரம் 05 Kg நிறையுடைய லாஃப்ஸ் சமையல் எரிவாயுவின் விலை 65 ரூபாயினால் அதிகரிக்கப்பட்டுள்ளது. 

இதன்படி 05 Kg நிறையுடைய லாஃப்ஸ் சமையல் எரிவாயுவின் புதிய விலை 1,710 ரூபாவாக நிர்ணயிக்கப்பட்டுள்ளது.