'16 வயதினிலே' திரைப்படத்தின் மூலம் தமிழ் சினிமாவில் இயக்குனராக அறிமுகமானவர் பாரதி ராஜா. அவருடைய முதலாவது படத்திலேயே ரஜினி, கமல், ஸ்ரீதேவி என்று முன்னணி நடிகர், நடிகைகளை வைத்து குறித்த திரைப்படத்தை இயக்கினார்.
தொடர்ந்து பல படங்களை இயக்கிய பாரதிராஜா ராதிகா, ராதா, கார்த்திக் உட்பட பல முன்னணி நடிகர்கள் மற்றும் நடிகைகளை அறிமுகம் செய்த பெருமை இவரையே சாரும்.
முதல் மரியாதை, கிழக்கே போகும் ரெயில், அலைகள் ஓய்வதில்லை உட்பட பல வெற்றிப் படங்களை இயக்கியிருக்கிறார். இயக்குனராக மட்டுமல்லாமல் தற்போது நடிகராகவும் பல திரைப்டங்களில் நடித்துள்ளார்.
திருச்சிற்றம்பலம் திரைப்படத்தில் தனுஷிற்கு தாத்தா கேரக்டரில் நடித்திருந்தார். தொடர்ந்து பல்வேறு படங்களில் குணச்சித்திர கதாபாத்திரங்களில் நடித்து வருகின்றார்.
இந்நிலையில் அவருடைய ஒரே மகனும் நடிகரும் இயக்குனருமான மனோஜ் பாரதிராஜா கடந்த 2025 மார்ச் மாதம் திடீரென காலமானார்.
மகனுடைய மரணம் பாரதி ராஜாவை மிகவும் நிலைகுலையச் செய்தது. இதனை தொடர்ந்து மலேசியாவிலுள்ள தனது மகள் வீட்டில் சில மாதங்கள் ஓய்வெடுத்து பின்னர் சென்னைக்கு திரும்பினார்.
இந்நிலையில் 80 வயதை கடந்துள்ள பாரதிராஜா தற்போது உடல் நலக்குறைவு காரணமாக சென்னையிலுள்ள தனியார் வைத்தியசாலையில் அனுமதிக்கப்பட்டுள்ளார்.
கடந்த 03 நாட்களாக அவருக்கு சிகிச்சை அளிக்கப்பட்டு வருகின்றது. பாரதிராஜாவின் உடல்நிலை சீராக இருப்பதாகவும் வழக்கமான பரிசோதனைக்காக மருத்துவமனையில் அனுமதிக்கப்பட்டுள்ளதாகவும் பாரதிராஜா தரப்பில் தெரிவிக்கப்பட்டுள்ளது.
0 Comments